طريقة مايكروسوفت اللي بتتبعها في عملية التطوير .

طريقة مايكروسوفت اللي بتتبعها في عملية التطوير .
________

مايكروسوفت بدأت تطوير ويندوز 10 موبايل في شهر فبراير 2015 وساعتها كانت بتطور برضو في ويندوز 10 للبي سي لغاية لما نزلت بشكل رسمي في اخر شهر 7 وطبعا كان لازم يهتمو بنسخة البي سي الأول لان العالم كله بيستخدم ويندوز اكيد .

- مايكروسوفت مقسمة عملية التطوير لأقسام
القسم اللي شغالين عليه دلوقتي هو Threshold 2 واختصارته TH2 ودا اللى هيكون التحديث النهائي وزي ما قولت مايكروسوفت بدأت في تطويرة من سنه و نزلت بيلدات كتير لغاية ما وصلت حالياً لبيلد 10586 ودي افضل بيلد وصلولها من خلال البيلدات دي كلها وبالفعل وقفو عندها وبدأو ينزلو تحديثات cumulative او تراكمية للبيلد دي اللي هما 11 و 29 و 36 و 63 و 71 وأخيرا انهارده نزلت 107 واحتمال كبير متكنش الأخيرة، المقصود بالتحديثات التراكمية هي التحديثات اللى بتحسن من أداء واستقرار النسخة وحل بعض المشاكل الموجودة فيها وبمجرد ما بتنزل تحديث منهم بيغنيك عن تنزيل اللى قبله علشان كده اسمه تراكمي، ومايكروسوفت هتفضل تنزل تحديثات تراكمية لغاية ما الويندوز يبقي خالي من المشاكل وساعتها هينزل رسمي اللى ف نظري قرب جداً لان مايكروسوفت بقت بتنزل تحديثات تراكمية اسرع من الأول من بداية شهر 2 واللي خلي النسخة بقت احسن وافضل واسرع .

-بعد ما مايكروسوفت تنزل ويندوز 10 موبايل بشكل رسمي للناس اللي شغاله ب ويندوز فون 8.1 هيحصل ايه ؟ مايكروسوفت هتنام ؟ لا هيكملوا تطوير وهيدخلو علي القسم التاني اللى اسمه Redstone وهيكون علي مرحلتين Rs1 و Rs2 الأول طبعاً هيبدأو ب Rs1 وهيعملوا نفس اللى حصل مع TH2 هيبدأو ينزلو بيلدات للانسايدرز ويشوفو اراء الناس ويحلو المشاكل لغاية ما يوصلو لبيلد مستقرة ويبدأو ينزلو عليها تحديثات تراكمية وف الاخر ينزل التحديث الأول لريدستون للناس بشكل رسمي وبعد كده يبدأو في تطوير تحديث ريدستون التاني ويعملو نفس الخطوات وهكذا ودي خريطة الطريق بتاعتهم لسنة 2016 .

________
-نيجي بقي لتطبيق الانسايدر :

انهاردة مايكروسوفت عملت حلقة جديدة باسم Release Preview يبقي احنا كده عندنا 4 حلقات :
-Fast Ring
-Slow Ring
-Production ring
-Release Preview ring

اول واحده fast ودي الحلقة اللي بينزل عليها بيلدات بشكل اسرع مع أخطاء اكتر .
تاني واحده slow ودي الحلقة اللى بينزل عليها بيلدات بشكل بطيء مع أخطاء اقل .
تالت واحدة production ودي بتمكن مستخدمي ويندوز 10 موبايل من تنزيل اخر فريموير ودا طبعاً بيعتمد علي منطقتك ومزود الخدمة بتاعك .
رابع واحده والجديدة انهاردة release preview ودي هتركز علي الانسايدرز اللى بيفضلو البقاء في الفرع الحالي وهينزلهم تحديثات تراكمية وتحديثات للتطبيقات عادي عليها، والمقصود بالفرع الحالي يعني مثلا علي سبيل المثال حالياً مايكروسوفت واقفه عند الفرع او البيلد 10586 لان في ناس مش بتحب تجازف بأجهزتها وتدخل علي الفاست رينج وتنزل بيلدات ممكن تسبب تلف موبايلاتهم ولا حاجه، بس طبعاً حالياً مايكروسوفت وصلت ل 10586 ودي بيلد آمنه تماماً يعني مفيش مخاطر في الوقت الحالي والحلقة الرابعه دي هيتم استخدامها مع إصدارات الريدستون لان البيلدات اللى بتكون ف الأول بتبقي كلها مشاكل وناس كتير بتخاف ف علشان كده مايكروسوفت عملت الحلقة دي ولما عملية التطوير توصل لبيلد مستقرة زي اللى احنا فيها دلوقتي ساعتها مستخدمي الحلقة دي هيفضلو ع البيلد المستقرة او الفرع .

* برضو حاجه عايز اقولها بخصوص الانسايدر، مايكروسوفت لما بتبدأ في تطوير قسم معين من اللى قولت عليهم بيدولك مميزات كل بيلد بس مقابل المميزات دي بيكون في مشاكل كبيرة وقد تكون خطيرة وكل بيلد بتنزل بيكون فيها إصلاحات ومشاكل جديدة لغاية لما مايكروسوفت بتنتهي من المميزات تماماً بعد كده بتبدأ تنضف المشاكل .

وزي ما انتو شايفين في الصورة هتلاقو فرع التطوير اللى شغال علي طول لل fast و ال slow والفرع التاني الجديد release preview ودا هيكون للناس الحذرة اللى عايزه تفضل علي البيلد او الفرع الحالي زي ما قولنا .