تعلم كيف تصبح مصور محترف بكاميره هاتفك

كنت وعدتكم اني انزل شرح كامل ازاي تبقي مصور محترف بكاميره هاتفك اللوميا ..
طبعا قبل اي حاجه انتوا لازم تكونوا فاهمين حاجه !
كاميرات اللوميا بعدسات "كارل سيز" افضل عدسه تصوير في العالم و كنت نزلت تقرير من فتره عن العدسات دي وايه الي بيميزها عن غيرها من العدسات 
----
ازاي تقدر من خلال هاتفك اللوميا تبقي مصور محترف ؟!
---

الكاميره كل ما بتكون اعلي بتساعد في التقاط صوره اجمل وخلي بالك بقولك بتساااعد فقط الشغل الباقي بيكون علي المصور بمعني ان ممكن يكون واحد معاه كاميره بروفشنال و مبيعرفش يصور وواحد تاني معاه كاميره عاديه او مثلا هاتف لوميا بس بيقدر ياخد صور كويسه جدا

دلوقتي قبل ما اقول ازاي تستخدم الكاميره هقولك علي اخطاء ممكن تكون بترتكبها وانت بتصور .

معظم الي بيصوروا بيرتكبوا خطاء من غير قصد وهو انه بيصور الشئ وهو واقف مكانه ، مبيحاولش يتحرك من مكانه يغير زاويه التصوير وده بيخلي الصوره مفهاش اي لمسات فنيه ليك في الصوره دي حاجه

فيه كمان ناس بتقع في وهم ان ممكن الموبايل يصور في الاضاءه الضعيفه ! ، نادرا ما يمكنك التقاط صوره جيده في اضاءه ضعيفه

من ضمن الاخطاء برده انك تستخدم الزوم في صوره من الممكن انك تقرب ليها اكتر بنفسك ،، مهما كان نوع هاتفك او بغض النظر عند عدد الميجا بيكسل ،، الصوره من غير زووم بتكون اوضح و انقي من الصوره المقربه بالزووم

ومن ضمن الاخطاء الاكثر شيوعا هو جعل هدف التصوير في منتصف الشاشه ! وده بيفقد الصوره جمالها هنفترض انك هتصور منظر طبيعي والمنظر ده فيه فراشه و اشجار لو قسمت الشاشه بحيث انك تجيب الفراشه بزاويه معينه وتجيب الخلفيه معاها الي هي الاشجار هتبقي افضل بكتير من التقاط صوره مباشره للفراشه في منتصف الشاشه وطبق المثال ده علي اي حاجه ،،
---

دي كانت بعض اخطاء في التصوير الي بتخلي الصوره مش كويسه طبعا غير اهتزاز الصوره و غير الفلاش الي في الليل الي ممكن يخلي عين شخص لونها احمر في الصوره والحاجات المعروفه دي

نيجي بقي للمهم ازاي تستخدم كاميره موبايلك احسن استخدام وتطلع منها احسن صور ؟!

بص يامعلم مبدائيا انت علشان تصور صوره احترافيه مش هتقوم مطلع الموبايل من جيبك و فاتح الكاميره ومصور ع طول ،، في حاجات موجوده في اعدادات الكاميره المفروض تعرف بتستخدمها ازاي وبتاعت ايه ؟

اولا كده عشان في ناس متعرفش علشان تظبط اعدادات الكاميره هتفتح الكاميره وتدوس علي التصوير مع السحب لاعلي هتظهرلك اعدادات كتير وهي
White balance
Focus
Sensititvity
Shutter speed
Brightness

اولا الـ White balance
معناها ايه وبتعمل ايه؟
دي باختصار شديد بتظبط الصوره من حيث الاضاءه عاوزها ازاي ، وفيها اربع خيارات زي اضاءه في النهار او اضاءه ليليه او اضاءه مصباح او فلورسنت وفيه اختيار الauto الي هو تلقائي
---
ثانينا ال focus
مهما جدا جدا جدا جدا دي الي بتقدر تحدد بيها الاجسام الي عاوزها تظهر وتغيم الخلفيه علي سبيل المثال بطاقتك الشخصيه و باستخدام الفلاش وتحديد البطاقه بالمس الشاشه بتخلي البطاقه بس الي ظاهره والباقي ظلام وحتي لو كنت في اضاءه عاليه
وبتقدر تتحكم في الفوكس من خلال الاعدادت دي و تحدد نسبتها علي حسب رغبتك
---

ثالثا الـ Sensititvity
وده الي هو حساسيه الضوء
و عاوزك تركز اوي معايا

دلوقتي دي لو استخدمتها صح هتطلعلك جوده الصوره في الاضاءه الضعيفه جيده ولو استخدمتها غلط ممكن الصوره في الاضاءه الكويسه تطلع اكنها فيها حبوب و منغوشه
الـ iso ده عندنا في معظم الموبيلات اللوميا بيبداء من 63 لحد 3200
دي بتساعدك انك تصور صوره واضحه نسبيا في اضعف اضاءه
وبتظبط بيها علي حسب الاضاءه
كل ما كانت الاضائة ضعيفه >> الايزو يعلي >> الجوده تقل نسبيا
---
رابعا الـ shutter speed
ودي من معناها سرعه التقاط الصوره ودي بتساعدك في التقاط صوره في وقت اسرع او اقل حسب انت عاوز تصور ايه ،، مثال للتوضيح ، معاك بلونه فيها مايه و هتصورها وهي بتنفجر اكيد هتحتاج تكون سرعه التقاط الصوره سريعه جدا عشان تاخد افضل لقطه لحظه انفجار البلون

---
واخيرا الـ Brightness
مش محتاجه شرح دي بتظبط الاضاءه بتاعت الكاميره بتفتحها او بتغمقها حسب رغبتك ..

----
المصور المحترف هو الي ميقعش في الاخطاء الي ذكرناها في اول البوست ويقدر يستخدم الادوات دي و يبدع في التصوير مش مجرد فتح الكاميره و التقاط صوره وخلاص و علي العموم الكل بيجي بالتدريب

--
هسيبكم مع شويه صور من تصويري وارجوا ان شرحي يكون استفدتوا منه وان انتظاركم للشرح مكنش علي الفاضي

"ملحوظه : الصور بجوده اقل من الاصليه و نوع الهاتف#640XL