توضيح بخصوص مايكروسوفت

في حاجات محتاجين نوضحها مع بعض بخصوص مايكروسوفت.

-اولا نظام ويندوز 10 موبايل تم تطويرة في سنه مش 3 سنين.

-مايكروسوفت بتستمع لاقتراحات المستخدمين من خلال تطبيق Windows feedback وتقريبا النظام اغلبه اتعمل بناءاً علي اقتراحات المستخدمين، ومازال بيتم إضافة مميزات وتعديل بعض الأشياء في الويندوز بناءاً علي الاقتراحات دي واخرها كانت في اخر بيلد تجريبية واللي كان فيها ميزة السحب من اليمين للشمال او العكس للتنقل بين صفحات الويب في متصفح مايكروسوفت ايدج.

-مفيش غير شركتين هما اللي بينزلوا تحديثات باستمرار شهرياً لانظمتهم وهم مايكروسوفت وابل.

وبستغرب بصراحة لما اشوف واحد بيقول ايه التحديثات الكتيرة دي؟ لا ويكمل يقولك ان كل تحديث بينزل بيبوظ اللي قبله!

مش هننكر ان ممكن تحديث ينزل يكون فيه مشكلة لكن نبص للجانب الايجابي في الموضوع وهو ان الشركة بتديلك دعم مستمر من خلال التحديثات التراكمية اللي بتنزل كل شهر، وكل تحديث بينزل بيكون فيه مجموعة من الإصلاحات لبعض المشاكل وتحسين الأداء للويندوز بشكل عام زي مثلا تحسين أداء البطارية ومايكروسوفت ايدج... الخ

انا معايا موبايل هواوي G8 شغال بنظام أندرويد لولي بوب وعندي مشاكل في السوفتوير لان هواوي عامله السوفتوير بتاعها ios + wp مضروب في الخلاط مع الاندرويد 😂 المشاكل اللي عندي يعني علي سبيل المثال لما تيجي تسجل فيديو بالكاميرا بتلاقي الصوت واطي جدا ولازم وانت بتصور تكون قريب من مصدر الصوت علشان تسمعه بشكل كويس! والمشكله الاكبر بقي واللي بعاني منها وهي ان في تطبيقات كتير مش بيجيلي منها اشعارات وعلشان اعرف الاشعارات دي لازم ادخل علي التطبيق! طيب تمام ولو انا عايز حل للمشاكل دي اعمل ايه؟ مش المفروض الشركة تتحرك تنزل تحديثات للمستخدمين اللي بيعانو من المشاكل دي؟ ولا انت تخليني اشتري موبايل ب 3000 جنيه علشان اشتغل بسوفتوير فيه مشاكل ومفيش دعم! طب تخيلوا ان انا لسه مجاليش تحديث المارشميلو اللي بقالهم اكتر من سنة بيتكلموا عنه! وتخيلوا لما المارشميلو ينزل لجهازي ونفس المشاكل دي تكون موجودة او تظهر مشاكل جديدة هتتحل ازاي وانت اصلا الشركات اللي بتشتغل بالاندرويد دي مش هتبعتلك تحديثات!

اللي عايز اوصله ان انت لما يكون ليك دعم وتحديثات شهرياً دا بيحسسك دايما بالتجديد وبتكون راضي عن الفلوس اللي دفعتها في الموبايل، ما انت لمؤخذه مش هتجيب ايفون وتلاقي ابل تعمل زي شركات الاندرويد وتقولك استني التحديث السنوي (لولي بوب ومارشميلو... الخ) لا طبعا انت بتدفع فلوس بتاخد مقابلها خدمة ودعم وانا من حقي ان انا ماخدش حاجة معيوبه، فا المفروض ان انت تحمد ربنا ان شركتك بتدعمك بالتحديثات يعني الموضوع مش بس انزلك السوفتوير وخلاص كدة ملكش حاجة عندي زي ما بيحصل من هواوي وكل شركات الاندرويد لا انت المفروض تنزل السوفتوير اللي هو لولي بوب او مارشميلو او ايا كان وبعدين تنزل تحديثات تاني باستمرار علشان مشاكل السوفت بتاعك، مايكروسوفت نزلت ويندوز 10 وبعد ما نزل بدأت في ارسال التحديثات التراكمية شهرياً للمستخدمين ومفيش تفضيل لجهاز غالي عن جهاز رخيص كله بينزله التحديث في نفس الوقت اما لو بصيت علي الاندرويد هتلاقي ان مش كل الموبايلات طبعا بتتحدث غير اللي بتكون من الفئة المتوسطه العاليه و الفلاجشيب.

مايكروسوفت الشركة الوحيدة اللي بتبني نظامها مع المستخدمين 👥 ومن وجهة نظري تقريبا دا السبب اللي بيخلي ناس كتير تشتم في مايكروسوفت وتقول انهم بطاء و فاشلين... لكن لما انت يكون معاك موبايل بنظام أندرويد وليكن هواوي ولا هتعرف هما هيطورو النظام ازاي ولا هيضيفو فيه ايه ولا هيشيلو منه ايه يعني من الآخر بيطوروه براحتهم وعلى مزاجهم مش علي مزاجك وتقريبا دا السبب اللي بيخلي الناس تشكر فيهم مع ان لو بصيت للموضوع كويس هتلاقي ان تحديث مارشميلو فيه خمس مميزات جديدة فقط وعديمة الأهمية وحتي مفيش اي تغيير في الشكل دا غير ان فترة التطوير عدت السنة وكل دا علشان سوفتوير ميستاهلش في حين ان مايكروسوفت عملت نظامها من الصفر ومع المستخدمين في سنه وعلي الاقل ليها خارطة طريق واضحة للكل وهي ان في تحديث ريدستون 1 و 2 واحتمال 3 يعني كل مثلا 6 شهور في تحديث كبير بمميزات جديدة للنظام.
حاجه اخيرة علشان مطولش عليكم وهي ان مايكروسوفت لما اتكلمت في اخر مؤتمر ليها اللي هو بيلد 2016 مجابتش سيرة ويندوز موبايل وقالوا ان اهتمامهم السنادي مش هيكون للموبايل بس هيجي الوقت بتاعه وهيكون السنه اللي بعدها، هل دا معناه ان مايكروسوفت مش مهتمه او مش هتهتم بنظامها ويندوز 10 موبايل؟ لا طبعا هما لما اتكلموا في المؤتمر كان كل كلامهم عن anniversary update او تحديث ريدستون لويندوز 10 وخلي بالكم ويندوز 10 بي سي، اتكلموا عن ويندوز 10 بي سي باعتباره واجهتهم الرئيسية وباعتبار انه وصل لاكتر من 300 مليون مستخدم حول العالم وبما ان ويندوز 10 نواة واحدة وتطبيقات واحدة للبي سي وللموبايل وللتابلت فدا معناه ان المميزات اللي تم ذكرها في المؤتمر لويندوز 10 بي سي هتنزل للموبايل برضو 😂 وخير دليل ان مايكروسوفت مهتمه بقطاع الموبايلات هو التحديثات اللي بتنزل للنظام باستمرار يعني كلامهم في المؤتمر كان غير مباشر ومحتاج فهم لكن علي أرض الواقع كلامهم غير المباشر بيتأكد.