المصطلحات التي يجب معرفتها

في مصطلحات لازم نعرفها لان في ناس كتير متعرفهاش واكتر من واحد يسألني مثلا يقولي يعني ايه يونيفيرسال؟

-نبدأ بيونيفيرسال: اكيد مش الغسالة 😂

تطبيق او لعبة يونيفيرسال معناه ان التطبيق ده او اللعبه دي نازله لويندوز 10 سواء موبايل او كمبيوتر او تابلت، ودي تعتبر منصة جديدة عملتها مايكروسوفت علشان تدعم بيها نظامها اللي هو ويندوز 10، اختصارتها UWP يعني Universal Windows Platform.

ومش تحت شرط التطبيق ينزل لكل المنصات مرة واحدة يعني ممكن المطور ينزله للكمبيوتر الاول وبعديها بفترة ينزله للموبايل زي ما بيحصل معانا حالياً من شركة فيسبوك 😂، وممكن العكس ينزل الاول للموبايل وفيما بعد للبي سي و لو كان مطور ابن ناس ممكن ينزل التطبيق لكل المنصات في يوم واحد 😀
----------------------------

-في اصطلاحات تانية بنشوفها في تحديثات التطبيقات والالعاب يقولك مثلا Twitter snags a minor update المقصود ب minor update دي يعني تحديث صغير مفهوش إضافة مميزات وان كان بيكون فيه اصلاحات للمشاكل و تحسين أداء التطبيق.

وساعات بنشوف مثلا يقولك instagram receive a major update المقصود ب major update هنا يعني تحديث كبير او رائد بمعني ان فيه اصلاحات للمشاكل بالإضافة الي مميزات جديدة بتتضاف للتطبيق، يعني مثلا لما تضاف ميزة للماسنجر زي ميزة المكالمات الصوتيه والفيديو كول يبقي دا تحديث رائد ولا مش رائد يا متعلمين يابتوع المدارس؟ 😂

---------------------------

-تطبيق Windows insider

مايكروسوفت مع ويندوز 10 قررت انها تبني نظامها مع المستخدمين 👥وتشوف اراءهم ومقترحاتهم والمشاكل اللي بتواجههم من خلال البيلدات التجريبية اللي بتنزل للانسايدرز، وطبعاً التطبيق فيه اكتر من حلقة، في عندك حلقة fast دي بينزل عليها نسخ تجريبية لتحديث ريدستون بس الفاست بيكون اسرع مع مشاكل اكتر اما حلقة slow دي بتكون ابطء مع مشاكل اقل ودي برضو بينزل عليها نفس البيلدات التجريبية اللي بتنزل للفاست بس بشكل بطيء جدا، وفي عندك حلقة Release preview ودي بينزل عليها نفس البيلدات اللي بتنزل للنسخة الرسمية ودي حلقة مستقرة تماماً طبعاً يعني مش تجريبي.

------------------------------

-تحديث ريدستون

في ناس كتير سألتني يعني ايه ريدستون، عموماً دا مايكروسوفت اطلقت عليه اسم anniversary update و هو حالياً في مرحلة التطوير وبينزل منه نسخ تجريبية للانسايدرز و هينزل بشكل رسمي للموبايل والكمبيوتر في اخر شهر يوليو ان شاء الله، وبعد كده هيبدأو في تطوير ريدستون2 وهكذا.