سياسة مايكروسوفت

ايه رأيكم في سياسة مايكروسوفت في ارسال تحديثات لهواتفها شهرياً ؟ دا هيكون سؤالنا في استطلاع انهاردة!

ويندوز 10 موبايل لما نزل في شهر مارس اللى فات كان تقريباً غير مكتمل بنسبة 100% وكان فيه مشاكل كتير واولها مشكلة استنزاف البطارية بشكل سريع، ساعتها لما نزل الويندوز الجديد "gabe aul" قال ساعتها ان التحديثات التراكمية هتكون هي المفتاح لتحسين أداء الويندوز بشكل عام .

للناس اللى متعرفش .. مايكروسوفت كانت بتتبع نفس النظام دا في التحديثات الشهرية من زمان بس مع الويندوز الخاص بالاجهزة المكتبية ومع ويندوز 10 قررت تتبع النظام دا مع كل الأجهزة سواء فون او كمبيوتر.

مايكروسوفت بتسمع بشدة لآراء المستخدمين من خلال تطبيق windows feedback و feedback hub ومش بس ارائهم دا كمان بيتابعوا المشاكل اللى بيتم رفعها علي التطبيقين من المستخدمين علشان يتم النظر فيها ويحلوها في التحديثات التراكمية اللى بتنزل كل شهر وعلشان كده انا بقولكم أي مشكلة تواجهك او أي ميزة عايزها نزلها علي طول كفيدباك لان انت لما يكون عندك شركة بتسمع لكلامك ووجهة نظرك احسن من شركات تانية بتذلك علشان تحديث واحد وفي الآخر لو معجبكش مش هيسمعوا لكلامك، احب اقولك ان اغلب المميزات اللى تم اضافتها لويندوز 10 دى كانت من اقتراحات المستخدمين خلال فترة البيلدات التجريبية اللى كانت بتنزل لويندوز 10 وعلي سبيل المثال لما نزلوا متصفح مايكروسوفت ايدج وكان لسه جديد في الأول كانوا عاملين شريط العنوان من فوق زي جوجل كروم كده يعني لو عايز تكتب اسم الموقع هتلاقي شريط العنوان من فوق وطبعا الكلام دا مستخدمي الويندوز فون متعودوش عليه لانهم كانوا متعودين علي ان شريط العنوان يبقي من تحت زي انترنت اكسبلورر في ويندوز فون 8 و 8.1 وتم النظر في رأي المستخدمين وبالفعل رجعوا شريط العنوان من فوق وبقي تحت علشان يسهل عليك في الاستخدام، لدرجة ان مطورين مايكروسوفت ايدج عملوا فيديو صغير وسموه المتصفح الذي تم عملة بواسطتك! وعلي فكرة انا لو اتكلمت عن الحاجات اللى تم اضافتها من خلال الفيدباك مش هخلص ودا بيدل ان مايكروسوفت بتسمع لكل كبيرة وصغيرة.

ايه فايدة التحديثات التراكمية ؟

فايدتها اصلاح المشاكل وتحسين أداء النظام واستقرارة لكن مش بتضيف أي ميزة جديدة، وليه اسمها cumulative updates او تحديثات تراكمية ؟ لان اخر تحديث بيغنيك عن كل اللى قبلة يعني لو انت مثلا علي بيلد 107 وفي عندك تلت بيلدات تاني هيحمل اخر واحده منهم بس لان الأخيرة بتشمل كل اللى قبلها علشان كده اسمه تراكمي، اما بالنسبة للمميزات دي بيتم اضافتها في مرحلة التطوير وحالياً تحديث ريدستون في مرحلة التطوير وأضافوا مميزات جديدة فيه وكل بيلد تجريبية بتنزل لما بيضيفوا ليها مميزات دا بيكون ليه مقابل وهي مشاكل جديدة وبعد ما بينتهوا من إضافة كل المميزات بيبدأوا في اصدار بيلدات علشان يتخلصوا من المشاكل لغاية اصدار تحديث ريدستون بشكل رسمي في آخر يوليو.

البيلد الرسمية هي 10586 ودي اللى بينزل عليها التحديثات التراكمية اللى هو الرقم اللى بعدها وبيتغير 318 و 420...الخ ودا هيحصل مع ريدستون بعد ما ينزل بشكل رسمي ولما يستقروا علي بيلد معينة زي مثلا 16606 هيبدأوا ينزلوا تحديثات تراكمية للبيلد دي، يعني علي سبيل المثال 16606.10, 16606.29، 16606.420 وهكذا علشان يحسنوا النظام ويبقي مستقر اكتر وساعتها هيكونوا شغالين من ناحيتين برضو زي دلوقتي يعني هيبدأوا في تطوير ريدستون2 وهينزلوا بيلدات تجريبية والناحية التانية التحديثات التراكمية هتنزل للتحديث الرسمي بتاع 16606 .

بعد ما فهمت الليلة ماشية ازاي ايه رأيك في دعم مايكروسوفت لهواتفها او بمعني تاني هل انت راض عن سياسة مايكروسوفت في ارسال تحديثات لهواتفها شهرياً ؟

ياريت تشاركونا بالتصويت علي اللينك ده
https://polldaddy.com/poll/9447217/