تحديثات ويندوز 10

صباح الخير يوم سعيد ان شاء الله علي الجميع :)

الناس متلخبطة من التحديثات والبيلدات اللي بتنزل، ركز معايا علشان تفهم.

مايكروسوفت لما بدأت تطوير ويندوز 10 نزلت بيلدات كتييير لغاية ما وصلت عند 10586 ووقفت عند البيلد دي باعتبارها النسخة اللي هتكون نهائية لانها اكتر استقرار وان كان فيها بعض المشاكل البسيطة بس المشاكل دي مايكروسوفت بتحلها بالتحديثات التراكمية اللي بتنزلك من وقت للتاني، يعني لما نقول 10586.164 يبقي 164 دا تحديث تراكمي للنسخة الرسمية من ويندوز 10 اللي هي 10586 والتحديث التراكمي مش بيضيف مميزات للويندوز لكن بيحل المشاكل وبيحسن اداء الويندوز، واخر تحديث تراكمي كان رقمة 218 ومايكروسوفت هتستمر في اصدار التحديثات التراكمية لغاية ما ننتقل للقسم التاني 👇👇

تحديث ريدستون او anniversary update

حالياً بينزل منه بيلدات تجريبية لانه لسه في مرحلة التطوير وبما انه لسه في مرحلة التطوير يبقي انت مش ملزم تنزل حاجه تجريبية الا لو انت مش هامك المشاكل اللي هتواجهك وعايز تجرب المميزات الجديدة اللي بتنزل في كل بيلد.

ارقام بيلدات ريدستون هتلاقوها اعلي من القسم الحالي اللي هو 10586 يعني علي سبيل المثال اخر بيلد ريدستون رقمها 14322 ومايكروسوفت هتستمر في اصدار بيلدات لغاية ما تستقر علي بيلد وتنزلها بشكل رسمي للمستخدمين وساعتها هتبدا تنزل تحديثات تراكميه للريدستون وهكذا.

وللعلم تحديث الريدستون هيكون علي 2 wave او جزئين، الجزء الاول Rs1 هو اللي في مرحلة التطوير حاليا وبتنزل منه بيلدات تجريبية وهينزل رسمي في شهر 7، والجزء التاني Rs2 لسه هيكون في 2017 ان شاء الله.